„წითელი ჯვრის საერთაშორისო კომიტეტის“ ინფორმაციით, ასობით უკრაინელი სამხედრო, რომელთაც მარიუპოლში, „აზოვსტალის“ ქარხანა დატოვეს, „წითელი ჯვრის“ მიერ რეგისტრირებულია

„წითელი ჯვრის საერთაშორისო კომიტეტის“(ICRC) ინფორმაციით, ასობით უკრაინელი სამხედრო ტყვე, რომელთაც მარიუპოლში, „აზოვსტალის“ ფოლადის ქარხანა დატოვეს, „წითელი ჯვრის“ მიერ რეგისტრირებულია. ამის შესახებ ინფორმაციას Sky News-ი ავრცელებს.

მათივე ინფორმაციით, რუსეთი ამტკიცებდა, რომ 1730 უკრაინელი მებრძოლი, რომელიც ფოლადის ქარხანაში იმყოფებოდა, გაყვანილია. „წითელი ჯვრის“ განცხადებაში ნათქვამია, რომ ოპერაცია დღესაც გრძელდება.

„რეგისტრაციის პროცესი, რომელსაც „წითელი ჯვრის“ საერთაშორისო კომიტეტმა ხელი შეუწყო, გულისხმობს ინდივიდუალური ფორმის შევსებას პერსონალური მონაცემებით, როგორიცაა სახელი, დაბადების თარიღი და უახლოესი ნათესავი. აღნიშნული ინფორმაცია „წითელ ჯვარს“ საშუალებას აძლევს, რომ თვალყური ადევნოს მათ, ვინც დატყვევებულია და მათ, ოჯახებთან კონტაქტის შენარჩუნებაში დაეხმაროს“, - ნათქვამია ორგანიზაციის მიერ გავრცელებულ განცხადებაში.