მარიუპოლის ირგვლივ ბლოკპოსტებზე ე.წ. დონეცკის სახალხო რესპუბლიკის „ეროვნულ მილიციას“ როსგვარდიის წარმომადგენლები და კადიროველები ანაცვლებენ. ქალაქიდან ევაკუაცია ფაქტობრივად შეუძლებელი ხდება. ამის შესახებ მარიუპოლის მერის მრჩეველმა პეტრ ანდრიუშჩენკომ განაცხადა.
„ჩვენი წყაროები ქალაქიდან გვატყობინებენ, რომ საფილტრაციო პუნქტებსა და მარიუპოლის ირგვლივ მდებარე ბლოკპოსტებზე, ზაპოროჟიეს მიმართულებით, ოკუპანტების როტაცია მიმდინარეობს“,- განაცხადა ანდრიუშჩენკომ.
მისივე ინფორმაციით, ოკუპანტები კონტროლის ახალ პუნქტებს ქმნიან გრუნტის გზაზე, რომლითაც საფილტრაციო პუნქტებისთვის გვერდის ავლა შეიძლებოდა. ანდრიუშენკომ ხაზგასმით აღნიშნა, რომ დღევანდელი დღის შემდეგ ფაქტობრივად ქალაქიდან ნებისმიერი ევაკუაცია შეუძლებელი ხდება.