უკრაინის ხერსონის ოლქის რუსეთის მიერ დანიშნული ადმინისტრაცია მოსკოვს ოლქის ტერიტორიაზე სამხედრო ბაზის გახსნას სთხოვს, - ამის შესახებ ინფორმაციას რუსული მედია რუსეთის მიერ დანიშნული ხერსონის ე.წ. „სამოქალაქო-სამხედრო რეგიონული ადმინისტრაციის“ ხელმძღვანელის მოადგილეზე, კირილ სტრემუსოვზე დაყრდნობით ავრცელებს.
„ხერსონის ოლქში რუსული სამხედრო ბაზა უნდა იყოს. ჩვენ ამას მოვითხოვთ და ეს არის ის, რაც მთელ მოსახლეობას სურს. ეს იქნება რეგიონისა და მისი მოსახლეობის უსაფრთხოების გარანტი,“ - განაცხადა სტრემუსოვმა რუსულ მედიასთან საუბარში.
შეგახსენებთ, ხერსონის ოლქი ყირიმის ჩრდილოეთით მდებარეობს. ხერსონი იყო პირველი დიდი უკრაინული ქალაქი, რომელიც რუსულმა ძალებმა უკრაინაში შეჭრის შემდეგ დაიკავეს.