უკრაინის საგარეო საქმეთა მინისტრმა დმიტრო კულებამ დასავლეთის ქვეყნებს მათთვის 155 მილიმეტრიანი კალიბრის საარტილერიო დანადგარის და ზალპური ცეცხლის რეაქტიული სისტემების მიწოდებისკენ მოუწოდა. ამის შესახებ მან იტალიური გაზეთ La Repubblica-სთვის მიცემულ ინტერვიუში განაცხადა.
საგარეო უწყების ხელმძღვანელის თქმით, უკრაინის დამცველები იბრძვიან იმ ქვეყნის ჯართან, რომლის პრეზიდენტიც ვერ იტანს უკრაინას, მაგრამ უკრაინა არასდროს არ დანებდება.
„ჩვენ დროულად რომ მიგვეღო იარაღი დასავლეთისგან, უკვე გავათავისუფლებდით ხერსონს და სხვა ოლქებს. კონტრშეტევის დაწყების დრო ჯერ კიდევ მოვა. ჩვენ ვებრძვით ქვეყანას, რომლის პრეზიდენტსაც ვეზიზღებით და არ სურს, რომ ვარსებობდეთ. ჩვენ არასდროს დავნებდებით“,- განაცხადა კულებამ.
მისივე განმარტებით, უკრაინის სტრატეგია რუსეთის მიერ დაკავებული ტერიტორიების დაბრუნებაში მდგომარეობს როგორც სამხედრო ასევე დიპლომატიური გზით.
„ჩვენი სტრატეგია მდგომარეობს იმაში, რომ დავიბრუნოთ ყველაფერი, რაც შეგვიძლია სამხედრო საშუალებებით და დანარჩენი - დიპლომატიური გზებით. ჩვენ უნდა ვიპოვოთ ბალანსი ამ ორ გზას შორის“,- განაცხადა კულებამ.
