ჟურნალისტის დღესთან დაკავშირებით, უკრაინის პრეზიდენტმა ვოლოდიმირ ზელენსკიმ უკრაინული მედიის მუშაკებსა და რუსეთის სრულმასშტაბიანი შეჭრის შედეგად დაღუპული მედიის წარმომადგენლების ოჯახის წევრებს სახელმწიფო ჯილდოები გადასცა. ამის შესახებ ინფორმაციას უკრაინის პრეზიდენტის ადმინისტრაცია ავრცელებს.

"არ მინდა ბევრი სიტყვა წარმოვთქვა და დრო წაგართვათ. ვფიქრობ, ჟურნალისტებმა ყველაზე კარგად იციან, თუ რა არის სიტყვების ფასი და რა არის დროის ფასი, განსაკუთრებით ჩვენი სახელმწიფოსთვის ამ რთულ დროს", - განაცხადა ზელენსკიმ.

ადმინისტრაციის ცნობით, უკრაინის პრეზიდენტმა მადლობა გადაუხადა ჟურნალისტებს, რომლებიც უკრაინის შეიარაღებული ძალებისა და მთელი უკრაინელი ხალხის მსგავსად სახელმწიფოს იცავენ და ხალხს სიმართლეს აწვდიან.

"თქვენ მოგაქვთ სიმართლე და მნიშვნელოვანი ინფორმაცია - ძალიან ძლიერი, მნიშვნელოვანი, რაც ამ ბრძოლაში ჩვენი ქვეყნისთვის დიდი უპირატესობაა, რომელშიც ჩვენ აუცილებლად გავიმარჯვებთ", - დასძინა ზელენსკიმ.

ზელენსკის თქმით, 24 თებერვლიდან, რუსეთის შეჭრიდან დღემდე რუსეთის შეიარაღებული ძალების აგრესიის შედეგად 32 უკრაინელი და უცხოური მედიის წარმომადგენელი გარდაიცვალა.