„ერთიანი ნაციონალური მოძრაობა“ პარლამენტს დატოვებს იმ შემთხვევაში, თუ დანარჩენი ოპოზიციაც იგივე ნაბიჯის გადადგმას გადაწყვეტს. ამის შესახებ პარტიის გენერალურმა მდივანმა, პეტრე ცისკარიშვილმა „პალიტრანიუსის“ გადაცემა „360 გრადუსში“ განაცხადა.
მისი თქმით, აღნიშნული პროცესი ხელს შეუწყობს ვადამდელი არჩევნების ჩატარებას და ამ არჩევნებში "ქართული ოცნების" დამარცხებას.
როგორც ცისკარიშვილმა აღნიშნა, საკანონმდებლო ორგანოს დატოვებასთან დაკავშირებით, „ერთიან ნაციონალურ მოძრაობას“ დანარჩენ ოპოზიციურ პარტიებთან, ხშირად გაუმართავს კონსულტაციები.
„ეს საკითხი განიხილება, თუ პარლამენტიდან გამოსვლას აზრი ექნება. ინჯიას პარტია დარჩეს, დანარჩენი ოპოზიცია თუ გამოდის, „ქართულ ოცნებას“ ექმნება დისკომფორტი. აქედან გამომდინარე, ჩნდება შიდა პოლიტიკური კრიზისი, რომელიც იწვევს ვადამდელ არჩევნებს. ამ საქმისთვის [პარლამენტიდან] გამოსვლა, რა თქმა უნდა, კარგია, პროცესებს დააჩქარებს, არჩევნები ჩატარდება და „ოცნება“ დამარცხდება ვადამდელ არჩევნებში, მაგრამ მარტო ჩვენ გამოვიდეთ და ყველა სხვა დარჩეს, ამით პირიქით, დამატებით კომფორტს შევუქმნით „ქართულ ოცნებას“. ხშირად ყოფილა ამაზე კონსულტაციები, კონკრეტულ გადაწყვეტილებამდე არავინ მისულა“, - განაცხადა პეტრე ცისკარიშვილმა.