დაახლოებით 300 უკრაინელი მშვიდობიანი მოქალაქე, რომელთა უმრავლესობა ჟურნალისტი და სამოქალაქო აქტივისტია, ხერსონში დროებით ციხეებში იმყოფებიან. გარდა ამისა, თავისუფლება აქვთ აღკვეთილი ხერსონის რეგიონში, ოკუპირებულ დასახლებებში მყოფ დამატებით 300 პირს, - ამის შესახებ უკრაინის პრეზიდენტის წარმომადგენელი თამილა ტაშევა აცხადებს.

მისი თქმით, რეგიონში დაახლოებით 600 ადამიანია, რომლებიც "ფაქტობრივად მძევლები არიან და სპეციალურად აღჭურვილ სარდაფებში, რეალურად კი ციხეებში იმყოფებიან".

"ისინი არაადამიანურ პირობებში არიან და მათ აწამებენ. მოწმეები აცხადებენ, რომ ტირილის ხმა ისმოდა იმ ადგილებიდან, სადაც ჩვენი მოქალაქეების მიმართ ასეთი უკანონო ქმედებები ხორციელდება", - აღნიშნა უკრაინის ოფიციალურმა პირმა.

ტაშევამ ასევე დასძინა, რომ ზოგიერთი მშვიდობიანი მოქალაქე ხერსონის რეგიონიდან ყირიმშია გადაყვანილი.