რუსეთმა, უკრაინაში ომის პირველი 100 დღის განმავლობაში, წიაღისეული საწვავის ექსპორტის გზით 93 მილიარდი ევრო გამოიმუშავა, - ამის შესახებ ფინეთში დაფუძნებული ენერგიისა და სუფთა ჰაერის კვლევის ცენტრის (CREA) მოხსენებაშია აღნიშნული.

კვლევის ცენტრის ინფორმაციით, რუსეთიდან ექსპორტირებული წიაღისეული საწვავის 61%-ი ევროკავშირის ქვეყნებზე მოდის, რომლის საერთო ღირებულება 57 მილიარდ ევროს შეადგენს. ამასთან, საექსპორტო საშუალო ფასი გასულ წელთან შედარებით 60%-ით მაღალია.

ენერგიისა და სუფთა ჰაერის კვლევის ცენტრის ცნობით, აღნიშნულ პერიოდში რუსული წიაღისეული საწვავის ყველაზე მსხვილი იმპორტიორები იყვნენ ჩინეთი (12.6 მილიარდი ევრო), გერმანია (12.1 მილიარდი ევრო) და იტალია (7.8 მილიარდი ევრო).