ლუგანსკის ოლქის სამხედრო ადმინისტრაციის ხელმძღვანელის, სერჰი გაიდაის ინფორმაციით, რუსები სევეროდონეცკის 70 პროცენტს აკონტროლებენ, - ინფორმაციას უკრაინული მედია ავრცელებს.

გაიდაის თქმით, „აზოტის“ ქიმიურ ქარხანაში 500-მდე მოქალაქე რჩება, მათგან 40 ბავშვია.

„რუსები მთლიანად აკონტროლებენ სევეროდონეცკის დიდ ნაწილს. „აზოტში“ 500-მდე მცხოვრები რჩება, მათგან 40 ბავშვია. ინდუსტრიულ ზონას მტერი მსხვილი კალიბრის არტილერიიდან უხსნის ცეცხლს“, - აცხადებს გაიდაი.

მისივე განმარტებით, „აზოტში“ თავშესაფრები არ არის ისეთი ძლიერი, როგორც მარიუპოლის „აზოვსტალში“, ამიტომ ხელისუფლება და სამხედროები ცდილობენ განახორციელონ ორგანიზებული ევაკუაცია უსაფრთხოების გარანტიებით. მისივე თქმით, გრძელდება მოქალაქეების „ჩუმი ევაკუაცია“.