დაღუპული სამხედრო მოსამსახურეების ცხედრების გაცვლის ოპერაციის ფარგლებში ოკუპანტებმა უკრაინელებს „აზოვსტალის“ კიდევ 64 დამცველის ცხედარი გადასცეს, - ამის შესახებ უკრაინის დროებით ოკუპირებული ტერიტორიების რეინტეგრაციის სამინისტროში განაცხადეს.

მათივე ინფორმაციით, დაღუპული სამხედროების ცხედრების გაცვლის მორიგი ოპერაცია ზაპოროჟიეს ოლქში გაიმართა.

„უკრაინამ აზოვსტალის 64 გმირი დამცველის ცხედარი ღირსეულად დაკრძალვისთვის დააბრუნა“, - აცხადებენ უწყებაში.

აზოვის პოლკის ყოფილმა მეთაურმა მაქსიმ ჟორინმა 12 ივნისს განაცხადა, რომ გაცვლის რამდენიმე ოპერაციის შედეგად, კიევში „აზოვსტალში“ დაღუპული 220 გმირის ცხედარი იყო გადასვენებული.