„ლელოს" გენერალური მდივანი, ბადრი ჯაფარიძე და საგარეო მდივანი, გრიგოლ გეგელია პოლონეთის სეიმის ვიცე-სპიკერს ხვდებიან.

როგორც ბადრი ჯაფარიძემ შეხვედრის დაწყებამდე განაცხადა, შეხვედრაზე საუბარი შეეხება საქართველოში არსებულ ვითარებას და ქვეყნის პერსპექტივას ევროკავშირთან მიმართებით. მისივე თქმით, აღნიშნულ პროცესში აქტიურად არის ჩართული პოლონეთი.

„ხვალ უნდა გამოქვეყნდეს ევროკომისიის დასკვნა იმასთან დაკავშირებით, თუ როგორ ფასდება საქართველოში არსებული ვითარება, ისევე, როგორც მოლდოვასა და უკრაინაში. ამ დასკვნას და რეკომენდაციებს ექნება უდიდესი მნიშვნელობა ევროპული საბჭოს შეხვედრის წინ, შესაბამისად, საუბარი სავარაუდოდ ამ თემებზე იქნება.

პოლონეთი არის ჩვენი ქვეყნის უერთგულესი მეგობარი, ევროკავშირში ინტეგრაციის დიდი მხარდამჭერი და ამ შესაძლებლობას გამოვიყენებ. პოლონეთის სეიმის ვიცე-სპიკერთან შეხვედრის შესაძლებლობას გამოვიყენებთ იმისათვის, რომ კიდევ ერთხელ ვთხოვოთ ჩვენს მეგობრებს, რომ ჩვენი ქვეყნის მხარდაჭერა არ შეასუსტონ ევროკავშირში ინტეგრაციის მიმართულებით“, - განაცხადა ბადრი ჯაფარიძემ.