ვლადიმერ პუტინი უკრაინისთვის კანდიდატის სტატუსის მინიჭებაზე - ნატოსგან განსხვავებით, ევროკავშირი არ არის სამხედრო ორგანიზაცია, ამიტომ ჩვენ არაფერი გვაქვს ამის საწინააღმდეგო

რუსეთის პრეზიდენტმა ვლადიმერ პუტინმა განაცხადა, რომ რუსეთი არავის ემუქრება ბირთვული იარაღით, მაგრამ ყველამ უნდა იცოდეს, რას გამოიყენებს ის საკუთარი სუვერენიტეტის დასაცავად.

სანქტ-პეტერბურგის საერთაშორისო ეკონომიკურ ფორუმზე გამოსვლისას, კითხვაზე - არის თუ არა დასაბუთებული დასავლეთის ქვეყნების წარმომადგენლების განცხადებები ბირთვული ომისა და მესამე მსოფლიო ომის საფრთხის შესახებ, რუსეთის ლიდერმა ხაზგასმით აღნიშნა, რომ მოსკოვი „ისმენს ამგვარ რიტორიკას“.

„საიდან მოდის ეს? მათივე განცხადებებიდან. ან ერთი უპასუხისმგებლო პოლიტიკოსი რაღაცას იტყვის, მერე მეორე და ძალიან მაღალ დონეზე - ვთქვათ, საგარეო საქმეთა სამინისტროს დონეზე, ამაზე ყვირიან მაღალჩინოსნები და რა? ჩვენ ხომ არ გავჩუმდებით? შესაბამისად ვპასუხობთ, როგორც კი ვუპასუხეთ, მაშინვე ეკიდებიან ამას და ამბობენ: აი, რუსეთი გვემუქრება. ჩვენ არ ვემუქრებით, მაგრამ ყველამ უნდა იცოდეს, რა გვაქვს და რას გამოვიყენებთ ჩვენი სუვერენიტეტის დასაცავად“, - განაცხადა პუტინმა.

ვლადიმერ პუტინმა კომენტარი გააკეთა უკრაინის ევროკავშირის კანდიდატობის სტატუსზეც და განაცხადა, რომ ევროკავშირი არ არის სამხედრო ორგანიზაცია, ამიტომ რუსეთი არ არის წინააღმდეგი, რომ უკრაინა შეუერთდეს მას.

„ევროკავშირი არ არის სამხედრო ორგანიზაცია, სამხედრო-პოლიტიკური ბლოკი, ნატოსგან განსხვავებით, ამიტომ ჩვენ ყოველთვის ვამბობდით და მე ყოველთვის ვამბობდი, ჩვენი პოზიცია აქ არის თანმიმდევრული, გასაგები: ჩვენ არაფერი გვაქვს ამის საწინააღმდეგო“, - განაცხადა რუსეთის ლიდერმა.

მისი თქმით, მოსკოვი მხოლოდ უკრაინის „სამხედრო განვითარებას“ აპროტესტებდა, ხოლო ნებისმიერ გაერთიანებაში ეკონომიკური ინტეგრაციის შესახებ გადაწყვეტილებები თავად უკრაინელების გადასაწყვეტია.

თენგიზ ფხალაძე - დღეს თამაშის დრო ნამდვილად არ არის, 12-ვე ვალდებულება უნდა შესრულდეს და არა შესრულების ილუზია შეიქმნას, კანდიდატობის ვერ მიღება მხოლოდ ჩვენს თავს უნდა დავაბრალოთ და სხვას არავის
ქართული პრესის მიმოხილვა 27.06.2022
უკრაინის დამოუკიდებელი ანტიკორუფციული კომისიის აღმასრულებელი დირექტორი - დრო ჩვენთვის სიცოცხლით იზომება, ჩვენ არც თუ ისე ტოლერანტულები ვართ ლოდინისადმი - ამ დროში ვკარგავთ ქვეყანას, რომელსაც რუსეთი წამებით კლავს
„სილქ როუდ ჯგუფი“ ბიზნესმენ ლევან კაჭარავას გარდაცვალებას ეხმაურება
პირველი კრიპტო POS-ტერმინალი საქართველოშია