ევროკავშირის სანქციების მეშვიდე პაკეტი რაც შეიძლება მალეა საჭირო - რუსეთმა უნდა იგრძნოს მუდმივი ზეწოლა ომისთვის და მისი აგრესიული ანტიევროპული პოლიტიკისთვის, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

მისი თქმით, რუსეთის მორიგი მუქარა ლიეტუვის მიმართ, ენერგეტიკული ზეწოლის მორიგი ტალღა, რუსი ოფიციალური პირების მორიგი სიცრუე სასურსათო კრიზისთან დაკავშირებით სანქციების მეშვიდე პაკეტზე შესათანხმებლად არგუმენტებს წარმოადგენს.

ზელენსკიმ ფრონტის ხაზზე არსებულ ვითარებაზეც ისაუბრა და ხაზი გაუსვა, რომ ყველაზე ცუდი მდგომარეობა ლუგანსკსა და დონეცკშია.

„უკრაინის არმია აძლიერებს თავდაცვას ლუგანსკის ოლქში, რომელიც ახლა მართლაც უმძიმესი ზონაა. ოკუპანტები სერიოზულ ზეწოლას ახდენენ დონეცკის მიმართულებაზეც. ხარკოვის ოლქში ხორციელდება სასტიკი და ცინიკური რუსული საარტილერიო დაბომბვა. რუსული არმია ყრუა ყოველგვარი რაციონალურობის მიმართ. ის უბრალოდ ანადგურებს, კლავს. სამხრეთით ჩვენ ვიცავთ ჩვენს მიკოლაივის რეგიონს, ჩვენს ზაპოროჟიეს და თანდათან ვათავისუფლებთ ხერსონის რეგიონს,“- აღნიშნა ზელენსკიმ.