პრემიერ-მინისტრი - ჩვენ მოვახერხეთ მშვიდობის შენარჩუნება, არ ავყევით არც ოპოზიციის პროვოკაციებს, არც მათი პარტნიორების, უკრაინელების მოწოდებას, რომ აქ მეორე მარიუპოლი მოეწყოთ

ჩვენ მოვახერხეთ მშვიდობის შენარჩუნება. არ ავყევით ამათ [ოპოზიცია] მავნებლურ პროვოკაციებს, არც მათ განზრახვებს, მათი პარტნიორების, უკრაინელების მოწოდებას და სურვილებს, რომ აქ მეორე ფრონტი და მეორე მარიუპოლი მოეწყოთ, - ამის შესახებ პრემიერ-მინისტრმა ირაკლი ღარიბაშვილმა პარლამენტში სიტყვით გამოსვლისას განაცხადა.

მთავრობის მეთაურის განცხადებით, ქვეყანაში არის მშვიდობა, სტაბილურობა და 14%-იანი ეკონომიკური ზრდა. მისი თქმით, ევროპაში მსგავსი ზრდა არ არის.

„ჩვენ მოვახერხეთ მშვიდობის შენარჩუნება. არ ავყევით ამათ [ოპოზიცია] მავნებლურ პროვოკაციებს, არც მათ განზრახვებს, მათი პარტნიორების უკრაინელების მოწოდებას და სურვილებს, რომ აქ მეორე ფრონტი და მეორე მარიუპოლი მოეწყოთ. ეს ყველაფერი ავირიდეთ თავიდან. ქვეყანაში არის მშვიდობა, სტაბილურობა და 14%-იანი ეკონომიკური ზრდა, არსად არ არის მსგავსი. წელს პირველ კვარტალში 14.4 % ეკონომიკური ზრდა იყო, არსად არ არის ევროპაში. ინფლაცია ისტორიულ მაქსიმუმზეა ამერიკაში და ევროპაში, გერმანიაში, საფრანგეთში. თურქეთში 73%-იანი ინფლაციაა, მოლდოვაში 27% და ჩვენ ამ დროს 12-13%-იანი ინფლაციის დონის შენარჩუნებას ვახერხებთ, თან ეკონომიკის ორნიშნიანი ზრდის პირობებში და ასეთი ოპოზიციის პირობებში“, - განაცხადა ღარიბაშვილმა.