კახა კალაძე - მინდა ჩვენს ქვეყანას ის გადაწყვეტილება მივულოცო, რომელიც ევროპული პერსპექტივის სახით გაჟღერდა - კარგი იქნებოდა, კანდიდატის სტატუსი მიგვეღო, მაგრამ არაუშავს, არის კონკრეტული მიმართულებები, რომელსაც განხორციელება სჭირდება

მინდა ჩვენს ქვეყანას, ქართველ ხალხს ის გადაწყვეტილება მივულოცო, რომელიც გუშინ ევროპული პერსპექტივის სახით იქნა გაჟღერებული. რა თქმა უნდა, კარგი იქნებოდა, რომ კანდიდატის სტატუსი მიგვეღო, მაგრამ არა უშავს, არის კონკრეტული მიმართულებები, რომელსაც განხორციელება სჭირდება, - ამის შესახებ „ქართული ოცნების" გენერალურმა მდივანმა, თბილისის მერმა, კახა კალაძემ ჟურნალისტებთან საუბრისას განაცხადა.

მისი თქმით, ხელისუფლება საქართველოსთან დაკავშირებით ევროპული საბჭოს მიერ მიღებულ გადაწყვეტილებაზე პასუხისმგებლობას იღებს და ევროკომისიის რეკომენდაციებს რაც შეიძლება მალე შეასრულებს.

„რა თქმა უნდა, ჩვენ ვიღებთ ამაზე პასუხისმგებლობას და ის ყველაფერი, რაც არის გასაკეთებელი, შესრულებული იქნება, იმისთვის, რომ ქვეყანამ კანდიდატის სტატუსი ძალიან მალე მიიღოს.

პასუხისმგებლობის აღება გამოიხატება იმაში, რაც აქამდე ხელისუფლებამ გააკეთა. ის, რომ ჩვენ ასოცირებული წევრი ქვეყანა ვართ, ის, რომ დღეს უვიზოდ ქართული პასპორტებით ევროპულ ქვეყნებში გადაადგილება შესაძლებელია, ის, რომ ჩვენ ევროპასთან თავისუფალი ვაჭრობა გვაქვს, ეს ყველაფერი „ქართულმა ოცნებამ" საზოგადოებასთან ერთად გააკეთა და ასევე გავაკეთებთ ყველა იმ მოთხოვნას, რაც არის წარმოდგენილი," - განაცხადა კახა კალაძემ.