აკაკი მინაშვილი - ეროვნული თანხმობის მთავრობაში უნდა იყვნენ ადამიანები, ვისაც პარტიული ინტერესი არ აქვთ, ვინც ყველასთვის იქნება მისაღები

ევროკომისიის ერთ - ერთი მოთხოვნა არის დეოლიგარქიზაცია, ანუ მმართველობა, რომელიც არ არის კონტროლირებული ოლიგარქის მიერ, შესაბამისად, ეს მოთხოვნა არის ზუსტი და ადეკვატური - ეროვნული თანხმობის მთავრობაში უნდა იყვნენ ადამიანები, ვისაც პარტიული ინტერესი არ აქვთ, ვინც ყველასთვის იქნება მისაღები, - ამის შესახებ „ნაციონალური მოძრაობის" წევრმა აკაკი მინაშვილმა „ინტერპრესნიუსთან" განაცხადა, რითაც გამოეხმაურა აქციაზე გაჟღერებულ მოთხოვნას, რომ გადადგეს მთავრობა და შეიქმნას ეროვნული თანხმობის მთავრობა.

მისი თქმით, დღეს ხელისუფლების წარმომადგენელთა მიერ ჩატარებულმა ბრიფინგებმა კიდევ ერთხელ ცხადი გახადა, რომ ეს ხელისუფლება არ ასრულებს იმ მოთხოვნებს, რაც ჩამოყალიბებულია ევროკომისიის დასკვნაში.

„აგრძელებენ აგრესიულ რიტორიკას, კიდევ ერთხელ გვითხრეს: ბიძინა ივანიშვილი ოლიგარქი არ არის, სასამართლოს პრობლემები არ აქვს, პოლიტპატიმრები არ გვყავს. ევროკომისიის ერთ-ერთი მოთხოვნა არის დეოლიგარქიზაცია, ანუ მმართველობა, რომელიც არ არის კონტროლირებული ოლიგარქის მიერ, შესაბამისად, ეს მოთხოვნა არის ზუსტი და ადეკვატური.

ეს უნდა იყოს მთავრობა, სადაც არ არის ბიძინა ივანიშვილის გავლენა, ეს უნდა იყოს ადამიანების ჯგუფი, რომელიც შეასრულებს ვალდებულებებს, რაც განსაზღვრულია. ეს არის საერთო სახალხო ინიციატივა, ეს არ არის პარტიული ინიციატივა“, - განაცხადა აკაკი მინაშვილმა.