ევროინტეგრაციისა და ევროკავშირის წევრობის ეს პროცესი და მიზანი მოითხოვს ყველა პოლიტიკური ძალის, საზოგადოების ერთიანობას. გვჯერა, რომ ამის მიღწევა მოხდება, - ამის შესახებ საქართველოში ჩეხეთის ელჩმა, პეტრ მიკისკამ განაცხადა.
მისი თქმით, იმედი აქვს, რომ საქართველო წლის ბოლომდე მიაღწევს რეფორმების შედეგს.
„ჩვენ დიდი სურვილი გვაქვს მთავრობის, ოპოზიციის, სამოქალაქო საზოგადოების კოორდინირებული, გაერთიანებული და ინკლუზიური გზით ძალისხმევის შედეგად მიღწეული რეფორმების შედეგი და ამ რეფორმებით მიღწეული მიზანი წლის ბოლომდე ვიხილოთ და ამ გზით შესაძლებელი გახდეს კანდიდატის სტატუსის მოპოვების მიღწევა", - აღნიშნა ელჩმა.
მისი თქმით, „მიზანი მიღწევადია და ახლოს არის.“ ელჩმა ხაზი გაუსვა, რომ ეს არის პროცესი, რომელიც ქართულ საზოგადოებას სრულიად ახალ ცხოვრებას მოუტანს და ეს სამუშაო პირველ რიგში არის საქართველოსთვის და არა ევროკავშირისთვის.
„ევროინტეგრაციისა და ევროკავშირის წევრობის ეს პროცესი და მიზანი მოითხოვს ყველა პოლიტიკური ძალის, საზოგადოების ერთიანობას. იმის გათვალისწინებით, რომ ეს ერთიანობა აუცილებელია, გვჯერა, რომ მისი მიღწევა მოხდება,“- აღნიშნა ელჩმა.
