უკრაინაში ომის დაწყებიდან დღემდე ოკუპანტების მიერ 15 მილიონ კვადრატულ მეტრზე მეტი საცხოვრებელი ფართია განადგურებული. ამის შესახებ ინფორმაციას სახელმწიფო ხელისუფლების ორგანიზაციის საპარლამენტო კომიტეტის თავმჯდომარის მოადგილე ოლენა შულიაკი ავრცელებს.
მისივე თქმით, სახელმწიფო სერვისების ონლაინ გვერდზე განაცხადი 220 ათასმა ადამიანმა შეიტანა, ვისი სახლიც ომის შედეგად განადგურდა. ყველაზე მეტად საცხოვრებელი ფონდი დაზარალდა დონეცკის, ხარკოვის, კიევისა და ჩერნიგოვის ოლქებში.
შულიაკის შეფასებით, დაახლოებით 800 ათასი ადამიანი დარჩა საცხოვრებლის გარეშე, რუსეთის ფედერაციის აგრესიის შედეგად.
„რომ შევხედოთ რამდენი ადამიანი ცხოვრობდა ამ 15 მილიონ კვადრატულ მეტრზე, ეს 800 ათას ადამიანზე მეტია. 800 ათასი ადამიანი დარჩა თავისი სახლის გარეშე, ან სახლი საჭიროებს რემონტს“,- განაცხადა შულიაკმა.
მისივე ცნობით, სარეზერვო ფონდიდან ხელისუფლებამ 1,4 მილიარდი გრივნა გამოყო, რათა ცივი სეზონის დადგომამდე რაც შეიძლება მეტი საცხოვრებლის გარემონტება მოხდეს.