კახა ოქრიაშვილის განცხადებით, პარტიები „გირჩი“ და „მოქალაქეები“ „პრაქტიკულად „ქართული ოცნების“ პარტნიორები არიან, სამთავრობო ბლოკს წარმოადგენენ"

ოპოზიციონერი პოლიტიკოსის კახა ოქრიაშვილის განცხადებით, პარტიები „გირჩი“ და „მოქალაქეები“ „პრაქტიკულად „ქართული ოცნების“ პარტნიორები არიან, სამთავრობო ბლოკს წარმოადგენენ". აღნიშნულის შესახებ ოქრიაშვილმა ჟურნალისტებს განუცხადა.

„ისინი რომ შეკრულები არიან, ეს ძალიან ცუდი სიტყვაა, ისინი ჩვეულებრივი პარტნიორები არიან. მათი პარტიები წარმოადგენს „ქართული ოცნების“ ერთგვარ ტოტს. ამაში ცუდი არაფერია, უბრალოდ, ცუდი არის ის, როდესაც ამბობ, რომ ოპოზიციონერი ვარო და მერე ხარ სამთავრობო ბლოკის წევრი, პრაქტიკულად. ამაშია მთელი პრობლემა, თორემ ყველას თავისი არჩევანი აქვს", - აცხადებს ოქრიაშვილი.

მისი თქმით, საზოგადოებამ რომ გადახედოს „გირჩის“ და „მოქალაქეების“ ქმედებებს, ნახავს, რომ ისინი აკეთებენ იმას, რაც აწყობს „ქართულ ოცნებას“.

„ოცნების“ პროპაგანდა მათ ასაღებს იმდაგვარად, რომ ისინი ოპოზიციონერები არიან, ხოლო „ნაციონალური მოძრაობა“ და დანარჩენები, ვინც მათ პოლიტიკას არ ეთანხმებიან და მათი მონა არ არის, რადიკალური ოპოზიციაა", - განაცხადა კახა ოქრიაშვილმა და აღნიშნა, რომ ეს ორი პარტია ოპოზიცია არ არის.