უკრაინის პრეზიდენტის ოფისის ხელმძღვანელი, მიხაილო პოდოლიაკი რუსეთის პრეზიდენტის, ვლადიმერ პუტინის განცხადებას ეხმიანება და აცხადებს, რომ არანაირი „კოლექტიური დასავლეთის“ გეგმა არ არსებობს და რეალობა არის ის, რომ რუსული არმია უკრაინის ტერიტორიაზე შეიჭრა და მშვიდობიან მოსახლეობას ხოცავს.

„არანაირი „კოლექტიური დასავლეთის“ გეგმა არ არსებობს. არსებობს მხოლოდ კონკრეტული z-არმია, რომელიც შემოვიდა სუვერენულ უკრაინაში, ბომბავს ქალაქებს და ხოცავს მშვიდობიან მოსახლეობას. ყველაფერი დანარჩენი პრიმიტიული პროპაგანდაა. ამიტომაც ბატონი პუტინის მანტრა "ომი ბოლო უკრაინელამდე" რუსეთის მხრიდან მიზანმიმართული გენოციდის კიდევ ერთი დასტურია“, - წერს პოდოლიაკი „ტვიტერში“.

გუშინ, რუსეთის პრეზიდენტმა, ვლადიმერ პუტინმა განაცხადა, რომ დასავლეთს რუსეთთან უკანასკნელ უკრაინამდე ბრძოლა სურს. „არაერთხელ გვსმენია, რომ დასავლეთს ჩვენთან ბრძოლა უკანასკნელ უკრაინამდე სურს. ეს არის ტრაგედია უკრაინელი ხალხისთვის, მაგრამ ყველაფერი, როგორც ჩანს, ამისკენ მიდის“, - აღნიშნა პუტინმა სახელმწიფო სათათბიროს ფრაქციების ლიდერებთან შეხვედრაზე.