უკრაინის ვიცე პრემიერ-მინისტრი დროებით ოკუპირებული ტერიტორიების რეინტეგრაციის საკითხებში, ირინა ვერეშჩუკი ხერსონისა და ზაპოროჟიეს ოლქების ოკუპირებულ ტერიტორიებზე მცხოვრებ მოსახლეობას ყველა შესაძლო საშუალებით ევაკუაციისკენ კიდევ ერთხელ მოუწოდებს.
მისი თქმით, ევაკუაცია აუცილებელია იმისთვის, რომ უკრაინის შეიარაღებულმა ძალებმა დაგეგმილი კონტრშეტევის დროს საფრთხე არ შეუქმნან მშვიდობიან მოსახლეობას.
„ეს აუცილებელია იმისათვის, რომ უკრაინის შეიარაღებულმა ძალებმა შეტევითი ოპერაციების დროს საფრთხე არ შეუქმნან მშვიდობიან მოსახლეობას“, - განმარტა ვიცე-პრემიერმა.
მან მოქალაქეებს მოუწოდა, დატოვონ ტერიტორია ნებისმიერი მიმართულებით, თუნდაც ოკუპირებული ყირიმის გავლით.
"ცხადია, იქნება ბრძოლები, იქნება საარტილერიო დაბომბვა და ამიტომ მოვუწოდებთ მოქალაქეებს სასწრაფოდ ევაკუაციისკენ", - განაცხადა ვიცე-პრემიერმა.
ამასთან, მისი თქმით, ვერ იტყვის, ზუსტად როდის მოხდება კონტრშეტევა.