უკრაინა რუსეთის პრეზიდენტის, ვლადიმირ პუტინის მიერ ხელმოწერილ ბრძანებას გმობს, რომელიც ყველა უკრაინელისთვის რუსეთის მოქალაქეობის გამარტივებული პროცედურით მოპოვების საშუალებას იძლევა.

„უკრაინის საგარეო საქმეთა სამინისტრო მკაცრად გმობს რუსეთის ფედერაციის პრეზიდენტის 2022 წლის 11 ივლისის ბრძანებას, რომელიც ითვალისწინებს უკრაინის ყველა მოქალაქისთვის რუსეთის მოქალაქეობის მინიჭების გამარტივებულ პროცედურას. აღნიშნული გადაწყვეტილება უკრაინის სუვერენიტეტისა და ტერიტორიული მთლიანობის მორიგი ხელყოფაა, რომელიც შეუთავსებელია საერთაშორისო სამართლის ნორმებთან და პრინციპებთან”, - აღნიშნულია უკრაინის საგარეო საქმეთა სამინისტროს განცხადებაში.

ცნობისათვის, რუსეთის პრეზიდენტმა, ვლადიმერ პუტინმა ხელი მოაწერა განკარგულებას, რომლის მიხედვითაც უკრაინის ტერიტორიაზე მცხოვრები მოქალაქეებისთვის რუსეთის მოქალაქეობის მიღების გამარტივებული პროცედურა იმოქმედებს. „უკრაინის, დონეცკის სახალხო რესპუბლიკის ან ლუგანსკის სახალხო რესპუბლიკის მოქალაქეებს და მოქალაქეობის არმქონე პირებს, რომლებიც მუდმივად ცხოვრობენ დონეცკის სახალხო რესპუბლიკის, ლუგანსკის სახალხო რესპუბლიკის ან უკრაინის ტერიტორიაზე, უფლება აქვთ მოითხოვონ რუსეთის ფედერაციის მოქალაქეობა გამარტივებული წესით“, - ნათქვამია დოკუმენტში.