უკრაინა, ივლისში, 3 მილიარდი დოლარის საგარეო დაფინანსებას ელოდება, წლის ბოლომდე კი, 16-17 მილიარდ აშშ დოლარს. ამის შესახებ ფინანსთა მინისტრმა სერგეი მარჩენკომ განაცხადა.
„ამ თვეში 3 მილიარდ დოლარზე მეტს მივიღებთ, ან ველოდებით. წლის ბოლომდე საუბარია 16-დან 17 მილიარდ დოლარზე, იმის გათვალისწინებით, რაც უკვე მიღებულია“, - განაცხადა მინისტრმა.
მარჩენკოს თქმით, ომის დაწყებიდან უკრაინამ დაახლოებით 13 მილიარდი დოლარი მიიღო საგარეო დაფინანსების სახით, მათ შორის, ივნისში 4,4 მილიარდი დოლარი.
ფინანსთა სამინისტროს ხელმძღვანელმა ასევე ხაზგასმით აღნიშნა, რომ მთავრობა ცდილობს ბიუჯეტის ყოველთვიური დეფიციტი 5 მილიარდი დოლარის ფარგლებში შეინარჩუნოს და „ამ ჩარჩოს შესამცირებლად აუცილებელი გადაწყვეტილებებიც კი მიიღოს“.
მისი თქმით, საუბარია არა გადასახადების გაზრდაზე, არამედ საგადასახადო ბაზის გაფართოებაზე.