პარლამენტის ეროვნულ ბიბლიოთეკაში, ფილმების ციკლის - „ქართული ლიტერატურა 90 წუთში. გლობალური და ლოკალური“ - პრეზენტაცია გაიმართა
25 ივლისს, შედარებითი ლიტერატურის მსოფლიო კონგრესის ფარგლებში, საქართველოს პარლამენტის ეროვნულ ბიბლიოთეკაში, ფილმების ციკლის - „ქართული ლიტერატურა 90 წუთში. გლობალური და ლოკალური“ - პრეზენტაცია გაიმართა.
კავკასიის საერთაშორისო უნივერსიტეტის ცნობით, პროექტი კავკასიის საერთაშორისო უნივერსიტეტის მულტიმედია ცენტრმა, კომპარტივისტული ლიტერატურის ქართულ ასოციაციასა და თსუ-ს შოთა რუსთაველის სახელობის ქართული ლიტერატურის ინსტიტუტთან ერთად, შოთა რუსთაველის საქართველოს ეროვნული სამეცნიერო ფონდის მხარდაჭერით მოამზადა.
მათივე ცნობით, პროექტი, რომელიც მიზნად ისახავს ქართველი მწერლებისა და მათი საერთაშორისო ღვაწლის წარდგენას მსოფლიო საზოგადოებისთვის, 9 ფილმისგან შედგება.
„ფილმები მოგვითხრობს ავტორებზე, რომლებმაც ქართული ლიტერატურა მსოფლიო კულტურის უდიდეს საგანძურად აქციეს:
შოთა რუსთაველი და ქართული მწერლობის ადგილი შუა საუკუნეების მწერლობაში;
ნიკოლოზ ბარათაშვილი და მისი „მერანი“ მსოფლიო რომანტიკული პოეზიის ორბიტაზე; ილია ჭავჭავაძე - ქართული მწერლობის ბრძოლა სახელმწიფოებრიობისა და მოქალაქეობრივი ცნობიერებისათვის; ვაჟა-ფშაველა და კოსმოპოლიტიზმის ქართული თეორია; გალაკტიონ ტაბიძის „არტისტული ყვავილები“ და შარლ ბოდლერის „ბოროტების ყვავილები“; ტფილისი - ავანგარდული ქალაქი; მიხეილ ჯავახიშვილი - საბჭოური ნარატივის ალტერნატივა ქართულ მწერლობაში; ანა კალანდაძე - ქალი-პოეტი და ესთეტიკური ჩარჩოების განახლება; ირაკლი ჩარკვიანი და „მშვიდი ცურვა“ პოსტმოდერნისტული ნარატივისკენ.პროექტის ხელმძღვანელია, თბილისის სახელმწიფო უნივერსიტეტის პროფესორი, კომპარატივისტული ლიტერატურის ქართული ასოციაციის (GCLA) პრეზიდენტი - ირმა რატიანი, მიმართულების პროდიუსერი კი, კავკასიის საერთაშორისო უნივერსიტეტის მულტიმედია ცენტრის ხელმძღვანელი, თბილისის სახელმწიფო უნივერსიტეტის ასოცირებული პროფესორი - ნინო ჭალაგანიძე”,- აღნიშნულია ინფორმაციაში.
იხილეთ ფილმების ქართული და ინგლისურენოვანი ვერსიები ქვემოთ მითითებულ ბმულებზე:
