უკრაინის საგარეო საქმეთა მინისტრი დმიტრო კულება აცხადებს, რომ რუსეთის მიერ ოკუპირებულ ტერიტორიაზე, ელენოვკას კოლონიაზე თავდასხმით რუსეთმა კიდევ ერთი საშინელი, ომის დანაშაული ჩაიდინა.

„რუსეთმა კიდევ ერთი საშინელი სამხედრო დანაშაული ჩაიდინა ოკუპირებულ ელენოვკაში გამოსასწორებელი დაწესებულების დაბომბვით, სადაც მას უკრაინელი სამხედრო ტყვეები ჰყავდა. მოვუწოდებ ყველა პარტნიორს, საერთაშორისო ჰუმანიტარული სამართლის ეს სასტიკი დარღვევა მკაცრად დაგმონ და რუსეთი ტერორისტულ სახელმწიფოდ აღიარონ", - წერს კულება „ტვიტერზე".

ცნობისთვის, ცოტა ხნის წინ უკრაინის შეიარაღებული ძალების გენერალურმა შტაბმა განაცხადა, რომ სეპარატისტების მიერ დაკავებულ ტერიტორიაზე არსებულ ციხეზე უკრაინის თავდასხმის შესახებ რუსული მხარის მიერ გავრცელებული ინფორმაცია სიმართლეს არ შეესაბამება. თავდასხმას სულ მცირე 40 უკრაინელი სამხედრო ტყვე ემსხვერპლა.