თურქეთის ოფიციალური პირების განცხადებით, კიდევ ორმა გემმა უკრაინის ჩორნომორსკის პორტი დატოვა. შესაბამისად, გაერო-ს შუამდგომლობით მარცვლეულის ექსპორტის შეთანხმებით, უკრაინის შავი ზღვის პორტებიდან გასული გემების რიცხვმა 27-ს მიაღწია.

Reuters-ის ინფორმაციით, გემებზე- Zumrut Ana და MV Ocean S, 6 300 ტონა მზესუმზირის ზეთი და 25 000 ტონა ხორბალია დატვირთული.

ამასთან, უკრაინის საზღვაო პორტების ადმინისტრაციამ განაცხადა, რომ უკრაინის სამმა საზღვაო ნავსადგურმა დაიწყო საკვების ჩატვირთვა შვიდ გემზე, რომლებიც მსოფლიოს 66 500 ტონა ხორბალს, სიმინდისა და მზესუმზირის ზეთს უახლოეს მომავალში მიაწვდიან. ივლისის ბოლოს, გაეროსა და თურქეთის შუამავლობით მოსკოვსა და კიევს შორის გაფორმებული შეთანხმების საფუძველზე, უკრაინის შავი ზღვის სამი პორტიდან უკრაინული პროდუქტების გატანა ეტაპობრივად ხორციელდება.