დასავლეთის მოწოდებები ზაპოროჟიეს ატომური ელექტროსადგურის გარშემო დემილიტარიზებული ზონის შექმნის შესახებ უპასუხისმგებლოა, - ამის შესახებ გაეროში რუსეთის მუდმივმა წარმომადგენელმა, ვასილი ნებენზიამ გაერო-ს უშიშროების საბჭოს სხდომაზე განაცხადა.

„ზოგიერთი დასავლელი კოლეგა ფიქრობს, რომ არსებობს ერთადერთი და უმარტივესი გამოსავალი ამ სიტუაციიდან - რუსული ჯარების გაყვანა და დემილიტარიზებული ზონის შექმნა ზაპოროჟიეს ატომური ელექტროსადგურის გარშემო. ეს არის უპასუხისმგებლო განცხადება, რომელიც არ ითვალისწინებს ზაპოროჟიეს ატომური ელექტროსადგურის უსაფრთხო ფუნქციონირებისთვის პირობების შენარჩუნების აუცილებლობას“, - განაცხადა ნებენზიამ.

მისი თქმით კიევმა ზაპოროჟიეს ატომურ ელექტროსადგურზე „დაუდევარი თავდასხმები“ უნდა შეწყვიტოს.

„მოგიწოდებთ, აიძულოთ კიევი, ზაპოროჟიეს ატომურ ელექტროსადგურზე დაუდევარი თავდასხმები შეწყვიტოს“, - აღნიშნა რუსეთის ელჩმა.

შეხვედრის დროს, ვასილი ნებენზიამ პუტინის მოკავშირის, ალექსანდრ დუგინის ქალიშვილის, დარია დუგინას მკველობაში უკრაინელი სპეცსამსახურები დაადანაშაულა.

„ავტომობილი აფეთქდა. მასში დარია დუგინა იმყოფებოდა. ჩვენი კომპეტენტური ორგანოები იძიებენ მომხდარს და წინასწარი დასკვნებით, ეს ამაზრზენი დანაშაული უკრაინის სპეცსამსახურების მიერ იყო ორგანიზებული“, - განაცხადა რუსეთის ელჩმა.

მან გაერო-ს უშიშროების საბჭოს თავდასხმის დაგმობისკენ მოუწოდა.

გაეროს უშიშროების საბჭომ სხდომა ზაპოროჟიეს ატომურ ელექტროსადგურთან დაკავშირებით გამართა. სხდომა რუსეთმა მოიწვია.