ესპანეთის მთავრობამ უკრაინას საჰაერო თავდაცვის სისტემა, საბრძოლო მასალა და ჯავშანტექნიკა გაუგზავნა, - ინფორმაციას მედია საშუალებები ესპანეთის თავდაცვის სამინისტროზე დაყრდნობით ავრცელებენ.

მათივე ცნობით, სამხედრო დახმარების ტვირთი მოიცავს 20-მდე ჯავშანმანქანას, 75 პალეტს საველე არტილერიისთვის განკუთვნილი საბრძოლო მასალით და საჰაერო თავდაცვის ბატარეას, ასევე 1000 ტონა დიზელს, რომლის ღირებულებაა 2.5 მილიონი ევრო.

იარაღის გარდა, მომზადდა ტვირთი, რომელიც მოიცავს 30 000 ზამთრის სამხედრო ფორმას, 15 600 ქურთუკს, 15 000 პიჯაკს. აღნიშნული ტვირთის მიწოდება სექტემბრისთვისაა დაგეგმილი.

ესპანეთში უკრაინის ელჩმა სერჰი პოგორელცევმა აღნიშნა, რომ კიევი ყველაზე მეტად დაინტერესებულია 155 მმ-იანი ჰაუბიცებისა და 122 მმ-იანი ნაღმმტყორცნების მიწოდებით, რაც მან ესპანეთის მთავრობას უკვე აცნობა.