ლუგანსკის ოლქის გუბერნატორის, სერჰი გაიდაის ინფორმაციით, უკრაინულმა ძალებმა უკრაინის აღმოსავლეთ ნაწილში, ლუგანსკში წინ წაიწიეს და ფეხი მოიკიდეს.

„ლუგანსკის ოლქი თავის დაცვას განაგრძობს. მტრის თავდასხმები მოგერიებულია, არის გარკვეული დადებითი შედეგები: ჩვენმა დამცველებმა მცირედით წინ წაიწიეს და ფეხი მოიკიდეს. ველოდებით დეოკუპაციას“, - წერს გაიდაი.

მანამდე, უკრაინის პრეზიდენტის ადმინისტრაციის ხელმძღვანელის მრჩეველმა, ალექსეი არესტოვიჩმა განაცხადა, რომ უკრაინული ძალები კონტრშეტევას ქვეყნის აღმოსავლეთით და სამხრეთ-აღმოსავლეთითაც ახორციელებენ.

„უკრაინის შეიარაღებული ძალების კონტრშეტევითი მოქმედებები მიმდინარეობს არა მხოლოდ უკრაინის სამხრეთით, არამედ აღმოსავლეთით და სამხრეთ-აღმოსავლეთით“, - აღნიშნა არესტოვიჩმა.