უკრაინის შეიარაღებულმა ძალებმა უკრაინის სამხრეთ ნაწილში მდებარე რამდენიმე დასახლება დაიბრუნეს, - ამის შესახებ სამხრეთ უკრაინის თავდაცვის ძალების ერთობლივი საკოორდინაციო პრესცენტრის ხელმძღვანელმა ნატალია ჰუმენიუკმა განაცხადა.

მისი თქმითა, გათავისუფლებული ტერიტორიების შესახებ ინფორმაცია მოგვიანებით გახდება ცნობილი, რათა არ მოხდეს ოკუპანტების მხრიდან მასიური დარტყმების განხორციელება.

„არის ტერიტორიები, რომლებიც უკვე გავათავისუფლეთ და არსებობს სავარაუდო დრო ამ ტერიტორიების გამოცხადებისთვის, რომლებიც უკვე მთლიანად უკრაინის იურისდიქციაშია. ამიტომ, ცოტა ხანს მოვითმინოთ, ვამზადებთ ოფიციალურ შეტყობინებას ამ საკითხთან დაკავშირებით“, - განაცხადა ჰუმენიუკმა.

მისი თქმით, უკრაინელი სამხედროები ძალიან სერიოზულად აკვირდებიან, რათა გათავისუფლებულ დასახლებებში მტერმა მასიური საარტილერიო და საჰაერო დარტყმები არ განახორციელოს.