გერმანიის კანცლერი ოლაფ შოლცი ტელეფონით უკრაინის პრეზიდენტს ვოლოდიმირ ზელენსკის ესაუბრა. გერმანიის ლიდერმა უკრაინელ კოლეგას ოფიციალური ბერლინის განგრძობადი მხარდაჭერა აღუთქვა. ინფორმაციას დასავლური მედია გერმანიის მთავრობის პრესსპიკერზე დაყრდნობით ავრცელებს.

შოლცმა და ზელენსკიმ უკრაინის დახმარების შემდგომი გზები, მათ შორის, ომის შემდგომ ქვეყნის აღდგენა განიხილეს.

სატელეფონო საუბრისას გერმანიის კანცლერმა ყურადღება გაამახვილა 25 ოქტომბერს, ბერლინში დაგეგმილ საერთაშორისო კონფერენციის ინტენსიურ სამზადისზე, რომელიც უკრაინის დახმარებას შეეხება.

უკრაინისა და გერმანიის ლიდერები ასევე შეთანხმდნენ, რომ ზაპოროჟიეს ატომური ელექტროსადგურის დაცვას დიდი მნიშვნელობა აქვს. მათ მხარი დაუჭირეს ატომური ენერგიის საერთაშორისო სააგენტოს მიერ გუშინ გამოქვეყნებულ ანგარიშს, რომელიც ბირთვული ობიექტის გარშემო დაცვის ზონის შექმნას მოითხოვს.