ხარკოვის ოლქში რუსი დამპყრობლები დაბომბვას განაგრძობენ. გასული დღე-ღამის განმავლობაში, სამი მშვიდობიანი მოქალაქე დაშავდა, - ინფორმაციას ხარკოვის საოლქო-სამხედრო ადმინისტრაციის ხელმძღვანელი, ოლეგ სინეგუბოვი ავრცელებს. მისი თქმით, ამ ღამით ხარკოვისა და ხარკოვის ოლქის დასახლებული პუნქტების დაბომბვა არ დაფიქსირებულა.

„გასული დღის განმავლობაში მტერი ბომბავდა იზიუმის, კუპიანსკისა და ჩუგუევის რაიონების დასახლებულ პუნქტებს. სამწუხაროდ, არიან დაშავებულები“, - განაცხადა სინეგუბოვმა.

სინეგუბოვის განხადებით, ხარკოვის ოლქში გრძელდება დეოკუპაციის პროცესი. კერძოდ, რუსი დამპყრობლებისგან გათავისუფლებულია 300 დასახლებულ პუნქტზე მეტი, რომელშიც დაახლოებით 150 ათასი ადამიანი ცხოვრობს. მისი თქმით, ოლქის გათავისუფლებულ ტერიტორიებზე ნელ-ნელა ბრუნდება ნორმალური ცხოვრება, გრძელდება კრიტიკული ინფრასტრუქტურის განაღმვითი და აღდგენითი სამუშაოები, ხოლო ხალხი, რომელმაც თითქმის ნახევარი წელი გაატარა ოკუპაციაში, იღებს ჰუმანიტარულ დახმარებას.