ბოლო ერთი თვის განმავლობაში სახიფათო რეგიონებიდან და დროებით ოკუპირებული ტერიტორიებიდან 80 000-ზე მეტი უკრაინელია ევაკუირებული. ამის შესახებ ინფორმაციას უკრაინის რეინტეგრაციის სამინისტრო ავრცელებს.

„უკრაინელები უფრო მეტად გაცნობიერებულად უდგებიან ევაკუაციას, ისინი აფასებენ თავიანთ და საყვარელი ადამიანების სიცოცხლეს. თავის მხრივ, ჩვენ ყველაფერს ვაკეთებთ იმისთვის, რომ იძულებით გადაადგილებული პირები განვათავსოთ შესაფერის პირობებში და მივაწოდოთ ხალხს ყველაფერი, რაც მათ სჭირდებათ. განახორციელეთ ევაკუაცია, ჩვენ გელოდებით! არ დაგტოვებთ გასაჭირში მარტოს, - განაცხადა უკრაინის დროებით ოკუპირებული ტერიტორიების რეინტეგრაციის საკითხების მინისტრის მოადგილემ ოლექსი ბოროდაიმ.

მისი თქმით, სავალდებულო ევაკუაციის ფარგლებში დონეცკის ოლქი 17 000-ზე მეტმა თანამემამულემ დატოვა, რომელთაგან დაახლოებით 3 000 ბავშვია. ხერსონის ოლქის განსაკუთრებით საშიში რეგიონებიდან ევაკუირებულია 24 ათასზე მეტი ადამიანი, ხარკოვის რეგიონიდან - 5 ათასზე მეტი ადამიანი, 30 ათასზე მეტმა მოქალაქემ დატოვა ზაპოროჟიეს რეგიონი.