უკრაინის პრეზიდენტი ვოლოდიმირ ზელენსკი სამშაბათს გაეროს გენერალურ ასამბლეაზე სიტყვით გამოვა. ამის შესახებ ვოლოდიმირ ზელენსკიმ ვიდეომიმართვაში განაცხადა, რომელსაც უკრაინული მედია ავრცელებს.
„ხვალ იქნება ძალიან მნიშვნელოვანი დღე - ჩვენ ვამზადებთ გამოსვლას გაეროს გენერალურ ასამბლეაზე. სიგნალები ჩვენი სახელმწიფოსგან მნიშვნელოვანი იქნება", - განაცხადა ზელენსკიმ.
ასევე, უკრაინის პრეზიდენტის თქმით, მონაწილეობას მიიღებს სასურსათო უსაფრთხოების სამიტში.
„ეს არის გლობალური უსაფრთხოების ფუნდამენტურად მნიშვნელოვანი ელემენტი და უკრაინას აქვს სათქმელი“, - განაცხადა პრეზიდენტმა.
გარდა ამისა, უკრაინის სახელმწიფოს მეთაურს ექნება ონლაინ შეხვედრების სერია ამერიკელ პარტნიორებთან და ინვესტორებთან.
„ჩვენ ყველაფერს ვაკეთებთ უკრაინის საჭიროებების დასაკმაყოფილებლად ყველა დონეზე - თავდაცვა, ფინანსები, ეკონომიკა, დიპლომატია“, - დასძინა ზელენსკიმ.