„ვივამედის” კლინიკაში საზღვრის უკანონო კვეთის საქმეზე ყოფილი პრეზიდენტის, მიხეილ სააკაშვილის სასამართლო პროცესი მიმდინარეობს. დღევანდელ პროცესზე ბრალდებულმა მიხეილ სააკაშვილმა სასამართლოს ჩვენება უნდა მისცეს.

აღნიშნული საქმის პროკურორის, ლევან ვეფხვაძის ინფორმაციით, დღევანდელ სასამართლო პროცესზე კლინიკა „ვივამედიდან“ წარმოდგენილი იყო ცნობა, რომლის მიხედვითაც მიხეილ სააკაშვილს სასამართლოსთვის ჩვენების მიცემა შეუძლია.

„დღევანდელ სასამართლო პროცესზე კლინიკა „ვივამედიდან“ წარმოდგენილი იყო ცნობა, რომლის მიხედვითაც მიხეილ სააკაშვილს შეუძლია ჩვენების მიცემა, გამომდინარე აქედან, ვიშუამდგომლეთ გასვლით სხდომაში მონაწილეობა, რაც დააკმაყოფილა მოსამართლემ. ამ ეტაპამდე არაერთი პროცესი გადაიდო, სადაც წარმოდგენილი იყო ცნობა, რომ მას არ შეეძლო მონაწილეობის მიღება“, - აღნიშნა ლევან ვეფხვაძემ.

მიხეილ სააკაშვილის ადვოკატის, შოთა თუთბერიძის განცხადებით კი, არც ერთ ექიმს, ან სამედიცინო დაწესებულებას არ უთქვამს, რომ სააკაშვილი თავს კარგად გრძნობს, რის ინტერპრეტირებასაც „ქართული ოცნების” წევრები შეეცდებიან.

„ქართული ოცნების" საჯარო პირები შეეცდებიან დღევანდელი წერილის თარგმნას იმგვარად, რომ სააკაშვილი კარგად არის. არც ერთ ექიმს ან სამედიცინო დაწესებულებას არ უთქვამს, რომ სააკაშვილი თავს გრძნობს კარგად, სამედიცინო დაწესებულებამ აღნიშნა, რომ სააკაშვილს უჭირს მეტყველება, თავს გრძნობს სუსტად და იმყოფება მწოლიარე რეჟიმში”, - აღნიშნა შოთა თუთბერიძემ.