აკაკი ბობოხიძე - სააკაშვილის შესახებ უკრაინის სასამართლომ მიიღო სასამართლოებისთვის დამახასიათებელი სტანდარტული გადაწყვეტილება - ეს რაიმე განსაკუთრებული მოთხოვნა არ არის საქართველოს ხელისუფლების მიმართ

როგორც ვიცი, უკრაინის სასამართლომ მიიღო სასამართლოებისთვის დამახასიათებელი სტანდარტული გადაწყვეტილება უკრაინაში მიმდინარე სისხლის სამართლებრივ საქმესთან დაკავშირებით, - ასე პასუხობს „ევროპული საქართველოს“ გენერალური მდივანი, აკაკი ბობოხიძე უკრაინის მხრიდან სააკაშვილის ექსტრადირების საქმეზე დასმულ შეკითხვას.

„ეს რაიმე განსაკუთრებული მოთხოვნა არ არის და ვერც იქნება საქართველოს ხელისუფლების მიმართ. მსგავსი მოლოდინების შექმნა, რომ „აი, ახლა ძალიან დიდი მოთხოვნა და გარღვევა არის სააკაშვილის ექსტრადირების საკითხში“ სინამდვილეში, საბოლოო ჯამში, იმ მდგომარეობამდე მიგვიყვანს, რომ „ივანიშვილმა კვლავ გაიმარჯვა და კვლავ დააიგნორა ყველა საკუთარი სურვილების მიღმა“. ბიძინას უძლეველობის მითს მსგავსი არასწორი მოლოდინების შექმნა უწყობს ხელს“, - განაცხადა აკაკი ბობოხიძემ.

ცნობისთვის, მესამე პრეზიდენტის, მიხეილ სააკაშვილის ადვოკატის, შალვა ხაჭაპურიძის განცხადებით, უკრაინის სასამართლომ მიიღო გადაწყვეტილება სააკაშვილის საქართველოდან უკრაინაში გადაცემის შესახებ, სადაც ის უნდა დაიკითხოს, როგორც დაზარალებული.