ყირიმის ხიდზე მომხდარი აფეთქების შედეგად 3 ადამიანი დაიღუპა
რუსეთის საგამოძიებო კომიტეტის ინფორმაციით, ყირიმის ხიდზე დღეს მომხდარი აფეთქების შედეგად სამი ადამიანი დაიღუპა. ისინი სავარაუდოდ, იმ სატვირთო მანქანის ახლომდებარე ავტომობილში ისხდნენ, რომელიც ხიდზე აფეთქდა.
„ორი გარდაცვლილის- მამაკაცისა და ქალის ცხედარი უკვე ამოყვანილია წყლიდან და მათი ვინაობა დგინდება“, - აცხადებენ უწყებაში.
მათივე ცნობით, გამომძიებლებმა დაადგინეს დეტალები სატვირთო მანქანისა და მისი მფლობელის შესახებ და ახლა მის სახლში ჩხრეკა მიმდინარეობს.
შეგახსენებთ, დღეს დილით ყირიმის ხიდზე სატვირთო ავტომობილი აფეთქდა, რის შედეგადაც საწვავის ავზები აალდა და ხიდზე ძლიერი ხანძარი გაჩნდა. ხიდის ნაწილი ჩამოიშალა და წყალში ჩავარდა.
ყირიმის, ანუ ქერჩის ხიდი ორი პარალელური ნაწილისგან, საავტომობილო და სარკინიგზო ნაწილისგან შედგება და ის რუსეთს ოკუპირებულ ყირიმთან აკავშირებს. ხიდი რუსეთმა ყირიმის ანექსიის შემდეგ ააშენა. ხიდის საავტომობილო ნაწილი, რომლის სიგრძე დაახლოებით 19 კმ-ია, რუსეთის პრეზიდენტმა ვლადიმერ პუტინმა 2018 წელს გახსნა, სარკინიგზო ხიდი კი ორი წლის შემდეგ გაიხსნა.
