ამერიკის შეერთებული შტატების ცენტრალური სადაზვერვო სააგენტოს (CIA) დირექტორი უილიამ ბერნსი ოქტომბერში უკრაინაში იმყოფებოდა, - ამის შესახებ CNN-ი ინფორმირებულ წყაროებზე დაყრდნობით იუწყება.
მათი ცნობით, ვიზიტის დროს უილიამ ბერნსმა დაადასტურა აშშ-ის ვალდებულება რუსეთის აგრესიის წინააღმდეგ ბრძოლაში უკრაინისთვის მხარდაჭერის შესახებ, მათ შორის სადაზვერვო ინფორმაციის გაზიარების მუდმივი მხარდაჭერის კუთხით.
CNN-ი განმარტავს, რომ ბერნსის ვიზიტი იმ ფონზე შედგა, როდესაც აშშ შეშფოთებულია უკრაინის წინააღმდეგ ომში რუსეთის მიერ ბირთვული იარაღის შესაძლო გამოყენების გამო. ამასთან, ბერნსი და სხვა ამერიკელი ოფიციალური პირები საჯაროდ აცხადებენ, რომ ვერ ხედავენ მტკიცებულებას, მოსკოვი აქტიურად ემზადებოდეს ასეთი ნაბიჯის გადასადგმელად.