უკრაინის საჰაერო თავდაცვამ დღეს დილით რუსეთის მიერ გაშვებული ორმოცდაათზე მეტი რაკეტიდან 44 ჩამოაგდო, - ამის შესახებ უკრაინის შეიარაღებული ძალების საჰაერო ძალები იუწყება.

„31 ოქტომბერს დილით, 07:00 საათზე რუსმა ოკუპანტებმა უკრაინის კრიტიკულ ინფრასტრუქტურაზე სარაკეტო იერიშის რამდენიმე ტალღა განახორციელეს. 50-ზე მეტი X-101/X-555 ტიპის ფრთოსანი რაკეტა კასპიის ზღვის ჩრდილოეთიდან და ვოლგოდონსკის რაიონიდან (როსტოვის ოლქი) გამოისროლეს“, - აცხადებენ უკრაინის საჰაერო ძალებში.

მათივე ინფორმაციით, საჰაერო ძალების ძალებმა და საშუალებებმა 44 ფრთოსანი რაკეტა გაანადგურეს. აქედან, 18 - საჰაერო სარდლობის „ცენტრის“ პასუხისმგებლობის ზონებში, 12 - საჰაერო სარდლობა „სამხრეთის“ პასუხისმგებლობის ზონებში, 9 - საჰაერო სარდლობა „აღმოსავლეთის“, 5 კი - „დასავლეთის“.