უკრაინის გადასაწყვეტია, როდის დაიწყებს მოლაპარაკებებს რუსეთთან, - ამის შესახებ ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჯოზეფ ბორელმა ბრიუსელში ჟურნალისტებს განუცხადა, რითაც მან კომენტარი გააკეთა სპეკულაციებზე იმის შესახებ, რომ დასავლეთი, შესაძლოა, კიევს მოსკოვთან მოლაპარაკებების დაწყებისკენ უბიძგებდეს.
„უკრაინა გადაწყვეტს რა გააკეთოს. ჩვენი მოვალეობა მათი მხარდაჭერაა", - განაცხადა დიპლომატმა.
ცნობისათვის, ბრიუსელში დღეს და ხვალ საგარეო საქმეთა საბჭო გაიმართება. დღეს ბლოკის საგარეო საქმეთა მინისტრების, ხვალ კი - თავდაცვის მინისტრების შეხვედრა გაიმართება. შეხვედრებზე, სხვა საკითხებთან ერთად, უკრაინის წინააღმდეგ რუსეთის აგრესიასაც განიხილავენ.