„გირჩი - მეტი თავისუფლების“ თავმჯდომარის, ზურაბ ჯაფარიძის განცხადებით, საქართველოს პრეზიდენტს, სალომე ზურაბიშვილს ნიკა გვარამიას შეწყალების ბერკეტი აქვს, თუმცა, აღნიშნულს ივანიშვილთან შეთანხმების გარეშე არ გამოიყენებს.
როგორც ჯაფარიძე განმარტავს, ხშირ შემთხვევაში ზურაბიშვილი სწორ შეფასებებს აკეთებს, თუმცა, ის ივანიშვილს არ უპირისპირდება.
„ვიდრე ქვეყანაში პოლიტპატიმრები არსებობენ, არანაირი სტატუსი არ იქნება. შარლ მიშელის კაბინეტის განცხადებაში, რაც მე ვნახე, ზედმეტად დიპლომატიური ენა არის გამოყენებული, მაშინ როცა, ბრიუსელში ჩავდივართ, იქ გაცილებით პირდაპირი საუბრებია ხოლმე. პრეზიდენტის პოზიციას რაც შეეხება, შეწყალების ბერკეტი აქვს, მაგრამ არ მჯერა, რომ მის გამოყენებას ის ივანიშვილთან შეთანხმების გარეშე ცდის. ზოგადად, ხშირ შემთხვევაში, პრეზიდენტი ბევრ სწორ შეფასებას აკეთებს ხოლმე, ოღონდ, როცა მთავარ საკითხს ეხება საქმე, ის არასდროს უპირისპირდება ივანიშვილს, არასდროს პასუხისმგებლობას ივანიშვილს არ აკისრებს და აქ სიტუაციას ისე ხატავს, თითქოს, პრობლემები, რომელიც ქვეყანას აქვს, მათ შორის, ევროინტეგრაციასთან დაკავშირებით, ღარიბაშვილის და კობახიძის პასუხისმგებლობაა და არა ივანიშვილის, რაც სიმართლე არ არის“, - განაცხადა ჯაფარიძემ.
ის ასევე გამოეხმაურა საქართველოს პრეზიდენტის მიერ მიხეილ სააკაშვილთან დაკავშირებით გაკეთებულ განცხადებას, რომლის მიხედვითაც, თუკი, შესაბამისი საექსპერტო დასკვნა იქნება, სააკაშვილთან დაკავშირებით გადაწყვეტილება სასამართლომ უნდა მიიღოს.
„სალომე ზურაბიშვილს რაში დასჭირდა ეს განცხადება არ ვიცი, მაგრამ ნებისმიერ შემთხვევაში, თუ სასამართლო მიიღებს გადაწყვეტილებას, რომელიც მერე არ მოეწონება, შეიძლება ეს თქვას, ოღონდ პასუხისმგებლობას აკიდებს ვთქვათ, მურუსიძე-ჩინჩალაძეს და სასამართლოს და არა ივანიშვილს. არც ერთ შემთხვევაში ივანიშვილს არ დაადანაშაულებს იმაში, რაც ხდება. ზურაბიშვილს ახასიათებს განცხადებებში ბევრი სიმართლის საუბარი, ოღონდ, ეს სიმართლე მთავრდება იქ, როცა საკითხი მიდგება ივანიშვილის პასუხისმგებლობაზე“, - განაცხადა ჯაფარიძემ.