რუსულმა ძალებმა, გასული დღის განმავლობაში, ხერსონის ოლქის ტერიტორია 34-ჯერ დაბომბეს, - ინფორმაციას უკრაინული მედია ხერსონის საოლქო სამხედრო ადმინისტრაციის ხელმძღვანელზე, იაროსლავ იანუშევიჩზე დაყრდნობით ავრცელებს.

მისი თქმით, მტერი აგრძელებს მიზანმიმართულ თავდასხმას სამოქალაქო ინფრასტრუქტურასა და მშვიდობიან მოსახლეობაზე.

„ხერსონის საცხოვრებელი უბნები კვლავ მტრის ცეცხლის ქვეშ აღმოჩნდა. საარტილერიო ჭურვებმა გაანადგურა კერძო სახლები და მაღალსართულიანი საცხოვრებელი კორპუსები. რუსებმა ცეცხლი გაუხსნეს ზელენოვკას, ტოკარევკას, ანტონოვკას, ნოვოტიაგინკას და დარიევკას. ბერისლავის რაიონი - რუსმა ოკუპანტებმა დაბომბეს მატროსოვკა და კაჩკაროვკა“, - აცხადებს იანუშევიჩი.

ამ დროისთვის არსებული ინფორმაციით, თავდასხმის შედეგად 1 ადამიანი დაიღუპა, კიდევ 2 კი - დაშავდა.