უკრაინის თავდაცვის ძალებმა, გასული დღის განმავლობაში, რუსი ოკუპანტების თავდასხმები 16 დასახლებულ პუნქტში მოიგერიეს, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

„გასული დღის განმავლობაში თავდაცვის ძალების ნაწილებმა მოიგერიეს ოკუპანტების თავდასხმები ლუგანსკის ოლქის ნოვოსელივსკეს, სტელმახივკას, ნოვოეგოროვკას, მაკიივკას, ჩერვონოპოპოვკასა და ბელოგოროვკას დასახლებებში და დონეცკის ოლქის ვერხნეკამენსკოეს, სოლედარის, იაკოვლივკას, ბახმუცკის, ბახმუტის, კლიშივკას, კურდიუმივკას, მაიორსკის, ავდიივკას და მარინკას დასახლებულ პუნქტებში", - აღნიშნულია ანგარიშში.

გარდა ამისა, უწყების ცნობით, უკრაინელებმა მოწინააღმდეგის პირადი შემადგენლობის, იარაღისა და სამხედრო ტექნიკის თავმოყრის ადგილებს ხუთი დარტყმა მიაყენეს.

გენშტაბში აცხადებენ, რომ რუსულმა ძალებმა, გასული დღის განმავლობაში, 7 სარაკეტო დარტყმა განახორციელეს, მათ შორის 5 დონეცკის ოლქის ქალაქ კონსტანტინოვკას სამოქალაქო ინფრასტრუქტურაზე და ასევე განხორციელდა 79 თავდასხმა მრავალჯერადი სარაკეტო სისტემებიდან, მათ შორის ქალაქ ხერსონზე.

„თავდასხმის შედეგად მშვიდობიან მოსახლეობაში დანაკარგებია", - აცხადებენ უწყებაში.