რუსმა ოკუპანტებმა ზაპოროჟიეს ოლქში, ტოკმაკში მნიშვნელოვანი ზარალი განიცადეს, რის გამოც ქალაქში მობილური კრემატორიუმები მუშაობს, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

„14 დეკემბერს, ზაპოროჟიეს ოლქის ტოკმაკის დასახლებული პუნქტის ტერიტორიაზე უკრაინის თავდაცვის ძალებმა გაანადგურეს 10-მდე სხვადასხვა ტიპის სამხედრო ტექნიკა. ქალაქში რუსული მობილური კრემატორიუმების მუშაობა ფიქსირდება“, - აცხადებენ გენშტაბში.

უწყება ასევე ავრცელებს ინფორმაციას ხერსონის ოლქის ლაზურნეს დასახლებაში 30 ოკუპანტის განადგურების შესახებ. ამასთან, უკრაინის გენშტაბის ცნობით, ლუგანსკის ოლქის ქალაქ კადიევკაში 11 დეკემბერს 60-მდე რუსი სამხედრო დაიღუპა.