რუსეთის თავდაცვის მინისტრმა, სერგეი შოიგუმ უკრაინაში, ე.წ „სპეციალურ სამხედრო ოპერაციაში“ მონაწილე ჯარების ინსპექტირება მოახდინა. ამის შესახებ ინფორმაცია რუსეთის თავდაცვის სამინისტრომ დღეს გაავრცელა.
„რუსეთის არმიის მეთაურმა ჯარების განლაგების ტერიტორიები და რუსული ქვედანაყოფების მოწინავე პოზიციები შეამოწმა სპეცოპერაციის ზონაში“, - ნათქვამია რუსეთის თავდაცვის უწყების განცხადებაში.
ამასთან, სამინისტროს განცხადებაში ნათქვამია, რომ შოიგუ სამხედროებს გაესაუბრა, თუმცა, უცნობია, როდის შედგა ეს ვიზიტი ან ეწვია თუ არა რუსეთის თავდაცვის მინისტრი თავად უკრაინას.
განცხადებასთან ერთად გამოქვეყნებულ მოკლე ვიდეოში ნაჩვენებია სამხედრო ვერტმფრენში მყოფი შოიგუ.