რობერტა მეცოლა - ომი სასწრაფოდ უნდა დასრულდეს და უკრაინამ უნდა მოიგოს
ომი სასწრაფოდ უნდა შეწყდეს და უკრაინამ უნდა მოიგოს, - ამის შესახებ ევროპარლამენტის პრეზიდენტმა რობერტა მეცოლამ განაცხადა.
როგორც გამოცემა Bild-ი წერს, მან მოუწოდა უკრაინის მიმართ მეტი ფინანსური და სამხედრო მხარდაჭერისკენ რუსეთის აგრესიის წინააღმდეგ.
"ეს ომი სასწრაფოდ უნდა დასრულდეს და უკრაინამ უნდა მოიგოს ეს ომი. ეს ნიშნავს მეტ იარაღს უკრაინისთვის, მეტ ფინანსურ და ჰუმანიტარულ დახმარებას, მეტ პრაქტიკულ სოლიდარობას და მეტ სანქციებს რუსეთის წინააღმდეგ", - განაცხადა მეცოლამ.
მან დასძინა, რომ იგი "ამაყობს იმ მხარდაჭერით, რომელსაც ჩვენ უკრაინას ამ გაუმართლებელი ომის დაწყებიდან ვთავაზობთ" ევროკავშირის დონეზე.
ამასთან, მეცოლას თქმით, ევროკავშირს შეუძლია „მეტის გაკეთება“ და ამიტომ მიესალმება სანქციებს.
შეგახსენებთ, რომ ევროკავშირის საბჭომ უკრაინის წინააღმდეგ რუსეთის ომის ესკალაციის საპასუხოდ კიდევ 141 ფიზიკური და 49 იურიდიული პირის მიმართ სანქციების დაწესების გადაწყვეტილება მიიღო.
