გიორგი კირთაძეზე თავდასხმა არის ივანიშვილის რეჟიმის სახე, პერსონალურად ამ კაცის და მისი პოლიტიკური არარაობა, ქვეყნის მოღალატე, მოძალადე, სიძულვილით სავსე რეჟიმის შედეგი , - ასე ეხმაურება „ევროპული საქართველოს“ თავმჯდომარე, გიგა ბოკერია „ნაციონალური მოძრაობის“ წევრ გიორგი კირთაძეზე ბათუმში განხორციელებულ თავდასხმას.

ბოკერიას თქმით, თავდასხმას ყველანაირი ნიშანი აქვს, რომ პირდაპირ მთავრობასთან დაკავშირებული ჯგუფის მიერ არის ჩადენილი,

„ასეც რომ არ იყოს, კლიმატი, სადაც ამ სამარცხვინო, ამაზრზენ სურათს ვხედავთ, არის პირდაპირ ბიძინა ივანიშვილის შემოქმედების შედეგი და ეს უნდა დავასრულოთ ჩვენ, ჩვენი ქვეყნის მომავლისთვის“, - განაცხადა ბოკერიამ.

ცნობისთვის, ბათუმში „ერთიანი ნაციონალური მოძრაობის“ ერთ-ერთ ლიდერს, გიორგი კირთაძეს თავს დაესხნენ.

როგორც კირთაძემ „ინტერპრესნიუსს“ განუცხადა, ჟურნალისტებთან საუბრისას უცნობი მამაკაცი მიუახლოვდა და კვერცხები დაუშინა. მისივე თქმით, აღნიშნული პირის უკან სუს-ი დგას.