განწყობა ბრიუსელში არის პოზიტიური. ევროკავშირი დადებითად აფასებს იმ პროცესს, რომელიც საქართველოში 12 პრიორიტეტის იმპლემენტაციის მიმართულებით მიმდინარეობს, - ამის შესახებ ევროკავშირში საქართველოს ელჩმა, ვახტანგ მახარობლიშვილმა ჟურნალისტებთან საუბრისას განაცხადა.

მისივე თქმით, ქართული მხარე 12 რეკომენდაციის შესრულების კუთხით, ევროკავშირის ინფორმირებას მუდმივად ახდენს.

ელჩის განცხადებით, „ჩვენ სამეზობლო კალათიდან გაფართოების კალათაში გადაგვიყვანეს და ნებისმიერი დისკუსია, შეხვედრა, თუ პროცესი, რომელიც ევროკავშირთან მიმდინარეობს, გაფართოების კონტექსტშია“.

"ბუნებრივია, ახლა ძალიან მნიშვნელოვან პერიოდში ვართ. ჩვენ ევროკავშირმა ის ნაბიჯები, პრიორიტეტები დაგვისახა, რომლის შესრულების პირობებში საქართველო კანდიდატი ქვეყნის სტატუსს მიიღებს და დარწმუნებული ვარ და მაქვს მოკრძალებული მოლოდინი, რომ ეს ახლო მომავალში აუცილებლად მოხდება. განწყობა ბრიუსელში არის პოზიტიური. ევროკავშირი დადებითად აფასებს იმ პროცესს, რომელიც საქართველოში 12 პრიორიტეტის იმპლემენტაციის მიმართულებით მიმდინარეობს," - განაცხადა ვახტანგ მახარობლიშვილმა.

ელჩის თქმით, უკრაინაში რუსეთის ომმა ძალიან მნიშვნელოვანი გეოპოლიტიკური ცვლილებები მოიტანა, მათ შორის ბრიუსელშიც.

"წელიწადი უამრავი სირთულით და გამოწვევით დაიწყო. ჩვენ სახეზე გვაქვს რუსული აგრესია, გაუმართლებელი ოკუპაცია, აგრესია ჩვენი მეგობარი, პარტნიორი სახელმწიფოს მიმართ, რამაც, რა თქმა უნდა, ძალიან მნიშვნელოვანი გეოპოლიტიკური ცვლილებები მოიტანა, არა მარტო ჩვენს რეგიონში, ზოგადად, რა თქმა უნდა, ევროპაში და მთელ მსოფლიოში," - განაცხადა ელჩმა.