ინდოეთის პრემიერ-მინისტრმა უკრაინის პრეზიდენტს განუცხადა, რომ ორივე მხარე როგორც რუსეთი, ისე უკრაინა, ომის დასასრულებლად დიალოგსა და დიპლომატიას უნდა დაუბრუნდნენ.

ინდოეთის მთავრობის მიერ გავრცელებულ განცხადებაში აღნიშნულია, რომ ნარენდრა მოდიმ საომარი მოქმედებების დაუყოვნებლივი შეწყვეტის შესახებ საკუთარი მოწოდება გაიმეორა.

მოდიმ ასევე გამოხატა ინდოეთის მხარდაჭერა ნებისმიერი სამშვიდობო ძალისხმევის მიმართ.

გარდა ამისა, ინდოეთის მთავრობამ განაცხადა, რომ ლიდერებმა სატელეფონო საუბრისას ორმხრივი თანამშრომლობის გაძლიერების შესაძლებლობები განიხილეს.