260-მდე რუსი სამხედრო დაიღუპა ან დაიჭრა ზაპოროჟიეს ოლქში, - ამის შესახებ ინფორმაციას უკრაინის შეიარაღებული ძალების გენერალური შტაბი ადასტურებს.

უწყების ცნობით, საუბარია 2 იანვარს, ზაპოროჟიეს ოლქის - ტოკმაკის, მელიტოპოლის, ბერდიანსკის, პოლოგისა და ვასილივკას - დასახლებებში განხორციელებულ თავდასხმაზე.

„განადგურდა საბრძოლო მასალის ორი შესანახი პუნქტი, 10-მდე სხვადასხვა ტიპის სამხედრო ტექნიკა, დაზიანდა რუსი სამხედროების დისლოცირების 2 პუნქტი და დაიღუპა ან დაიჭრა რუსეთის ფედერაციის შეიარაღებული ძალების 260-მდე სამხედრო მოსამსახურე“,- აღნიშნულია უკრაინის შეიარაღებული ძალების გენერალური შტაბის განცხადებაში.